À la traîsième Haute Rêunnion du Conseil Britannique-Irlandais en Jèrri en 2002, nou ‘tait d’avis qu’lé Gouvèrnément d’l’Assembliée Gallouaise prendra chèrge du travas entouor les langues minnoritaithes et régionales.

Châque membre du CBI peut s’vanter d’san riche héthitage lînguistique. Viyant qu’touos les membres veulent bein profiter d’s avantages pôssibl’yes dé faithe sèrvi les difféthentes langues, i’ lus en vont travailli ensembl’ye, chârer les miyeu pratiques, pâsser l’înformâtion et des matéthiaux et êtudier l’s expéthiences des aut’s sus tchiques difféthents tèrrains.

Nou-s-est à prépather un papi pouor la haute rêunnion du Conseil tch’étha lieu en Galles au S’tembre 2003. Chu papi, tout coumme lé travas d’la dgaîngue, s’en va aîdgi l’êchange et la pâss’sie d’înformâtion et d’miyeu pratiques entre les gouvèrnéments sus l’tèrrain des langues régionales, minnoritaithes et mains faites sèrvi.

I’ s’en va raconter les difféthentes mésuthes entréprînses achteu à seule fîn d’souôt’nîn les langues dans les pays participants et r’mèrtchi des tèrrains dé tchi qu’nou pouôrrait profiter en dêv’loppant eune pus grande co-opéthâtion entre les parchonnièrs. e